Keeping платформаси Иқтисодиёт ва молия вазирлигида тақдим этилди

Keeping платформасининг вакиллари Ўзбекистон Республикаси Иқтисодиёт ва молия вазирлигида платформа тақдимотини ўтказиб, унинг функционал имкониятлари ҳамда бухгалтерия ҳисобини рақамлаштириш бўйича таклифларини тақдим этди.

Учрашув давомида вазирлик мутасаддилари бухгалтерия платформалари бўйича мазкур ташаббус билан биринчилардан бўлиб мурожаат қилинганини алоҳида таъкидлаб, соҳада амалга оширилаётган ислоҳотлар ва бухгалтерия соҳасидаги ўзгаришлар ҳамда янгиликлар бўйича ўз тавсияларини доимий равишда бериб боришда ҳамкорлик қилишга келишиб олинди.

Тақдимот жараёнида вазирлик мутасаддилари Keeping платформасининг имкониятларини ижобий баҳолаб, тизимни турли тоифадаги бизнес субъектлари эҳтиёжларидан келиб чиқиб ривожлантириш бўйича ўз тавсияларини билдирдилар. Хусусан, кичик бизнес субъектлари платформанинг барча функционал имкониятларидан фойдаланишга эҳтиёж сезмаслигини инобатга олиб, улар учун соддалаштирилган ва мослаштирилган функционал ечимларни жорий этиш мақсадга мувофиқлиги таъкидланди. Шу билан бирга, ўрта ва йирик бизнес вакиллари учун кенгайтирилган функционал имкониятларни сақлаб қолиш зарурлиги қайд этилди.

Тақдимот давомида бухгалтерия ҳисобини автоматлаштириш, электрон ҳужжатлар айланишини ташкил этиш, банк тизимлари билан интеграция қилиш, иш ҳақини ҳисоблаш жараёнларини рақамлаштириш, шунингдек, сунъий интеллект (AI) технологиялари асосида бухгалтерия ҳужжатларини таҳлил қилиш имкониятлари юзасидан маълумотлар берилди.

Шунингдек, учрашувда вазирлик томонидан 2027-йилдан бошлаб Молиявий ҳисоб тизимини халқаро талаб ва стандартларга мувофиқ такомиллаштириш талаблари асосида босқичма-босқич трансформация қилиш ишлари амалга оширилаётгани маълум қилинди. Шу муносабат билан Keeping платформасини ҳам ушбу жараён билан уйғун равишда халқаро стандартларга мослаштириб бориш тавсия этилди.

Мутасаддилар платформани янада такомиллаштиришда ривожланган давлатлар тажрибасини, хусусан Буюк Британиянинг молиявий ҳисобот ва рақамли бухгалтерия тизимлари бўйича амалиётини ўрганиш ҳамда илғор ечимларни жорий этиш муҳимлигини таъкидладилар.

Учрашув якунида бухгалтерия ҳисобининг Молиявий ҳисоб тизимини халқаро талаб ва стандартларга мувофиқ трансформация қилиш жараёнида RealSoft компаниясини вазирликнинг мазкур йўналишдаги IT ҳамкорларидан бири сифатида жалб этиш юзасидан таклиф билдирилди. Ўз навбатида, компания мазкур ислоҳотларни қўллаб-қувватлаш, Keeping платформасини халқаро стандартлар асосида такомиллаштириш ҳамда барча зарур технологик ечимларни яратишда ёрдамга тайёр эканини билдирди.

Мазкур учрашув бухгалтерия ҳисоби соҳасини рақамлаштириш, халқаро стандартларга мос замонавий ечимларни жорий этиш ҳамда давлат ва хусусий сектор ҳамкорлигини янада ривожлантириш йўлидаги муҳим қадамлардан бири сифатида эътироф этилди.

Бухгалтерияни рақамлаштиришга қаратилган замонавий ечимни ўзингиз синаб кўрмоқчимисиз? Keeping платформасини бепул синаб кўринг.